ჩვენი ქართველი ჯადოქარი 30 წლის იუბილეს აღნიშნავს, რაც მისი მერვე იუბილეა „შტურმის“ მაისურით. ოთარ კიტეიშვილი შავ-თეთრებში გატარებულ დროს, ამჟამინდელ მდგომარეობასა და მიზნებზე საუბრობს.
გრაცის „შტურმის“ და საქართველოს ნაკრების ერთ-ერთი ლიდერი ოთარ კიტეიშვილი სანაკრებო შეკრებაზე 30 წლის გახდა, ავსტრიული გუნდის საიტმა კი ქართველ ფეხბურთელთან აი ეს ინტერვიუ გააკეთა.
ოთარ, „შტურმის” მაისურით უკვე მერვე დაბადების დღეს ხვდებით. ერთი წინადადებით შეაჯამეთ გრაცში გატარებული პერიოდი…
მოკლედ რომ ვთქვა, ეს არის ემოციებით, გამოწვევებითა და დასამახსოვრებელი მომენტებით სავსე მოგზაურობა. აქაურობამ ჩამომაყალიბა როგორც მოთამაშე და როგორც პიროვნება.
იყო როგორც ტრავმები, ისე დიდი წარმატებები. ყველაზე მეტად რამ გაგხადათ ძლიერი?
ვფიქრობ, ძლიერი რთულმა პერიოდმა გამხადა. ტრავმები, დაბრკოლებები ყოველთვის გაიძულებს მოთმინება გამოიჩინო და საკუთარი თავის რწმენა შეინარჩუნო. ზუსტად ეს დამეხმარა უკეთ შემეფასებინა მოვლენები და უფრო ძლიერი გავხდარიყავი.
უკვე ბევრი ეტაპი გაიარეთ „შტურმთან” ერთად. როგორ უყურებთ დღეს კლუბში მიმდინარე გარდაქმნებს?
დადებითად. მოდის არაერთი ახალი და ახალგაზრდა ფეხბურთელი. მათ საკუთარი შესაძლებლობების გამოვლენა სურთ. ცხადია, ყველაფერს სჭირდება დრო, მაგრამ ძალიან კარგი რაღაც ხდება.
როგორ ფიქრობთ, ასეთ დროს რა არის თქვენთვის მთავარი გამოწვევა?
ყველაზე დიდი გამოწვევაა მოედანზე სწრაფად განვითარდეს ახალი ურთიერთობები და ახალი იდეები. ყველამ უნდა ნახოს საკუთარი როლი და თან აუცილებლად გუნდურად ვიმოქმედოთ.
ცვლილებებისადმი თქვენი პირადი გამოცდილება დაგეხმარათ ამ რყევების უკეთ გააზრებაში?
რა თქმა უნდა. ბოლო წლებში ბევრი ცვლილება განვიცადე და ვიცი, რომ ეს სრულიად ნორმალურია. მთავარია, შეინარჩუნო სიმშვიდე და განაგრძო საკუთარ თავზე მუშაობა.
გუნდში არაერთი ახალგაზრდა ფეხბურთელია. რა გამოარჩევთ მათ?
მათ მოაქვთ დიდი ენერგია და სისწრაფე, ასევე თავდაჯერება. არ ეშინიათ პასუხისმგებლობის და ეს მნიშვნელოვანია.
გრძნობთ, რომ გუნდი ყოველ კვირას უფრო და უფრო ერთიანდება. იზიარებთ ამ მოსაზრებას?
დიახ, აბსოლუტურად. პროცესი იხვეწება და ერთმანეთს სულ უფრო და უფრო უკეთ ვუგებთ. ამას დრო სჭირდება, მაგრამ ვფიქრობ, რომ სწორ გზაზე ვართ.
მოედნის მიღმა რა გაძლევთ თავდაჯერებას და ძალას?
ოჯახთან და მეგობრებთან გატარებული დრო.
დაბოლოს, ცხოვრების ახალი, 31-ე წლისთვის რა სურვილები გაქვთ?
ყველაზე დიდი სურვილი ჯანმრთელობაა, ჩემთვის და ჩემი ოჯახისთვის. სპორტული კუთხით კი გუნდის წარმატებას ვისურვებდი. დასახულ მიზანს ერთად უნდა მივაღწიოთ.
